Suku i nos mente

Bo tabata sa ku suku ta limitá bo pensamentu? Bo tabata sa ku abo komo mayor ta e kousa ku bo yu ta inkieto? Den e artíkulo aki lo mi mustra bo dikon.
Pa medisina oriental (akupunktura)e mente tin relashon ku e tripa. Chines ta kompará e forma di e tripa ku e forma di e selebre i si bo wak esei bo ta mira ku e struktura tin su similaridat. P’esei chinesnan ta bisa ku ora bo tripa ta sushi bo mente tambe ta sushi; ora tripa ta funshoná poko poko e mente tambe ta funshoná poko poko. Ora bo kome kosnan ku no ta bon pa e kurpa bo no por ferwaktu ku e mente lo funshoná optimal tambe. Ora bo kome kuminda salu bo mente tambe ta funshoná salu. E uso di suku, produktonan kímiko, kolo artifisial, karni porko etc. Por afektá e tripa. Hopi bia mi ta mira den Klinika mucha ku no por siña na skol, nan no por konsentrá i nan ta intrankil (nan no por sinta ketu). Tur maestro di skol sa kon problemátiko un mucha asina ta. Nan no por sinta i skucha; nan mester lanta para i bai hasi ferfelu ku otro mucha. Esaki ta un situashon hopi tristu pasobra abo komo mayor ke e kos mas mihó pa bo yu; bo ke pa bo yu presta bon na skol i pa e ta esun mas inteligente den klas. Ta dushi ora bo yu haña bon punto na skol. Lo bo ke pa bo yu ta semper mihó ku e yu di bisiña ku semper ta kana broma ku su yu.
Si bo tene bo yu kontentu ku kosnan di boka dushi òf kos di bebe ku suku e ora ei ta imposibel pa e tin tripa ku ta funshoná normal. Dor di kome suku su resistensha tambe ta baha i ta p’esei e ta haña ferkout hopi lihé, problema di kútis, infekshon i problema di su tripa.
Tur rèspèt pa Sannicolas, e hòmber ku ta amigu di tur mucha, pero te awe mi no por komprondé di kon e santu aki no por kuminsá parti kosnan saludabel pa e mucha en bes di mangel, chukulati i otro kos sut. Sanikolas no por parti algu di fruta manera mandarein, apel òf un preimu? Di kon e mester sigui stroi e produktonan di suku, kolo artifisial, smak artifisial, holó artifisial i ku no tin niun klase di nutrishon pa nos muchanan. Al kontrario e kosnan aki ta hasi e muchanan mas agresivo i mala mucha.
Sanikolas no ta e úniko kulpabel ku ta kana rònt. Abo komo mayor òf edukador tambe ta responsabel. Ora duna un fiesta pasobra bo yu a hasi aña bo tambe por hasi algu pa tene bo yu i otronan ku ta bin kome i bebe riba bo yu su salu, salu. Mangel, chukulati, limonada, stropi, eiskrim, suku i mas suku bo por eliminá i parti kosnan manera fruta òf traha un bolo sin suku. Si bo mester pone suku bo por hasi uso di fruta ku ta hopi sut manera bakoba, apel, preimu, rasenchi, pa traha e bolo i dun’é un smak sut. Bo lo ripara ku bo yu no ta bira malu mas pasobra e a bai un fiesta.

Sientífikonan a yega di hasi un tèst pa wak kiko e relashon ta entre kuminda i komportashon. Na aña 1980 nan a kuminsá un seri di prueba den práktika pa haña sa si e komportashon agresivo di kriminal yòn ta bira mihó ora kome mas salu i un dieta ku ta yen di vitamina i mineral i kantidat di suku abuo. E dieta tabata basa riba nada di suku, nada di limonada, suku ta wòrdu remplasá pa miel, nada di pudin òf otro sorto di pasaboka. Banda di tur esei e muchanan ta haña hopi fruta fresku. E dieta den e prison ta wòrdu kambia sin ku e hóben ni e gerensia no tabata sa ku un pruf ta wòrdu hasi. A base di e rapòrtnan di dia e komportashon antisosial (bringamentu, agreshon, pleitamentu, i desobediensia na e gerensia) nan por a kalkulá si e komportashon agresivo ta oumentá òf bira ménos. Na total 12 prison pa hóben ku un total di 8076 hóben a wòrdu sigui. Serka 47% un kambio signifikante den komportashon antisosial a wòrdu konstatá.
Un promé estudio di Tidewater na Merka tabata ku 276 hóben ku a kometé durante dos aña un total di 934 akto antisosial. Despues di e dieta 48% a mustra ku e komportashon antisosial i agresivo a baha. Despues di un aña e agresividat a baha ku 33%. Na California tambe nan a hasi mes un tèst i mesun dieta serka dos grupo. Un grupo di 1382 i un otro di 289 hóben. Einan a ripara un redukshon di 44%. E redukshon mas tantu (86%) ku nan a mira ta serka residivista ku a kometé un akto kriminal. Serka drogadikto a mira un kambio di 72%. Na un prison na California, Stanislaus 3399 hóben a pasa den mesun pruf i aki serka 25% a mira kambio den komportashon. Den shete internat na California e kasonan di suisido a baha ku 44%. Lokual ku ta remarkabel ta ku serka 723 mucha muher no a mira kambio miéntras ku serka e mucha hòmbernan den mes un internat si a mira kambio. Den e prisonnan menshoná a usa un skema den kual nan ta duna e kuminda malu atrobe. I nan a kompará e aktitut atrobe. Ora trese bek e dieta yen di suku a ripara ku e komportashon antisosial a bini bek serka 54% di e hóbennan. E último tèst aki a wòrdu hasi ku 488 muchanan i a dura 22 luna.
Despues di tur e prufnan aki 803 skol na New York a disidí pa kambia e nutrishon na e skolnan. Einan nan a ripara ku e resultadonan di e alumnonan a subi. E dieta aki tabata konsistí di tiki vèt, kita suku i tur kolo sintétiko den kuminda òf bebida. E dieta ta e úniko kos ku por a kousa e kambio den prestashon di e studiantenan.
Un otro estudio ku a wòrdu hasi ta na un skol na unda e direktor a bisa ku nan ta kambia e dieta na skol pasobra mester spar sèn. Un persona ku tabata traha huntu ku e muchanan ku no tabata sa tokante e dieta i e resultadonan a nota ku e muchanan a kambia di aktitut despues di 4 luna i a puntra e a puntra e koleganan i e staf ku nan tabata sa e motibu. Niun hende no por a kompronde di kon e muchanan a kambia. Despues ku a anunsiá e resultado e staf no por a kere ku nutrishon tin asina tantu di haber ku komportashon. Despues di tur e datonan aki diferente prison i internat a adaptá nan manera di kome i e nutrishon di e prizoneronan, pasobra opviamente e ta yuda.

Esaki ta pone bo pensa: Lo na ta un bon idea pa enbes di eksigí un bon komportashon korekto di nos hobenan i nos yunan, di nos komo mayor pa kambia e nutrishon i ser un tiki mas kritiko riba lokual nos ta duna nos muchanan di kome? Si bo realisá esaki bo ta bira konsiente ku ora e mucha bin kas ku un mal rapòrt, ta abo komo mayor mester haña straf i no e mucha. Bo por kambia hopi kos masha fásil i kuminsá si muchu beheit ku un nutrishon saludabel pa bo yu i pa bo mes. Eliminá suku por kompleto for di nan dieta, duna nan mas fruta, berdura i pan brùin. Ku e un par kos simpel bo por yuda bo yu inmensamente.

Antes tabata nos kustumber di ora un hende komete un akto kriminal of komportashon malu tas ere den prison i tabata dune pan ku awa. Di e forma ei nos tabata limpia su tripa i dune un pensamentu salu. Awendia si bo djies vosifera esei nan ta bisa ku bo ta inhumano. Mi no ta bisa ku nos mester bai bek un par di siglo pasa pero mi ta boga pa un nutrishon hopi mas salu ku nos tin awor.
Tin asina tantu kos ku nos tin den nos mes man. Un di e kosnan ei ta nos salu !